Táknmálssvið

Teiknuð mynd af börnum að tala saman á táknmáli.

Hlutverk Táknmálssviðs Hlíðaskóla er að veita börnum með heyrnarskerðingu eða samþætta sjón- og heyrnarskerðingu kennslu við hæfi. Flestir nemendur á táknmálssviði fá kennslu á táknmáli eða táknmálsstuðning í kennslustundum. Nemendur á Táknmálssviði koma úr öllum hverfum borgarinnar og úr öðrum sveitarfélögum þegar það á við. Í þeim tilfellum greiðir sveitarfélagið sérstaklega fyrir skólavist barnsins. Nemendur á Táknmálssviði tilheyra almennum bekkjum og fylgja jafnöldrum sínum bæði í námi og félagsstarfi eins og kostur er. 

""

Hvað er Döff?

Á Íslandi er orðið Döff notað um heyrnarlaust fólk sem talar táknmál. 

""

Hvað er CODA?

CODA er skammstöfun fyrir Children Of Deaf Adults, þ.e.a.s börn heyrnarlausra foreldra.

""

Samskipti við Döff

Samskipti eru samvinna. Augnsamband er lykilatriði í samskiptum við Döff. Sum nota íslenskt táknmál til þess að tjá sig og skilja önnur en það lokar ekki á samskipti við þau sem ekki tala táknmál. Notaðu bendingar og skýrar varahreyfingar þegar þú talar og ekki hika við að nota myndir í símanum þínum eða teikningar til þess að styðja við mál þitt. Svo má líka skrifast á með blaði og blýanti eða á skjá. 

Nám og kennsla

Fagfólk Táknmálssviðs skipuleggur nám nemenda miðað við námslega stöðu og getu hvers og eins, að höfðu samráði við foreldra, deildarstjóra og umsjónarkennara. Kennsla á Táknmálssviði miðast við Aðalnámsskrá grunnskóla eins og mögulegt er.

Teiknuð mynd af börnum að lesa og skrifa við borð í skólastofu.

Einstaklingsmiðað nám

Á Táknmálssviði er unnið út frá markmiðum um einstaklingsmiðað nám. Fagfólk á Táknmálssviði skipuleggur kennsluhætti í samstarfi við umsjónarkennara og foreldra. 
Kennsla fer að mestu fram í heimabekk þar sem nemendur fá stuðning á táknmáli. Í sumum tilfellum er túlkur í tímum, í öðrum bekkjum er tveggja kennara kerfi. Einstaka nemendahópar fá kennslu í litlum hópum á táknmáli. 
 
 

Námsmat

Námsmat á Táknmálssviði er unnið  í takt við annað námsmat í skólanum. Fylgst er náið með námsframvindu og félagslegri stöðu barnanna. 

Ráðgjafi Táknmálssviðs

Hildur Heimisdóttir er kennsluráðgjafi á Táknmálssviði. Frá því haustið 2023 hefur Hlíðaskóli deilt kennsluráðgjafa með Heyrnar- og talmeinastöð Íslands. Innan skólans er kennurum veitt ráðgjöf um kennslufyrirkomulag, samskiptaleiðir, námsgögn og fleira sem tengist kennslu á táknmáli. Aðrir skólar geta sótt stuðning við kennslu nemenda með heyrnarskerðingu til ráðgjafa Táknmálssviðs. 
 

Hafa samband við ráðgjafa Stuðningsefni fyrir kennara á heimasíðu HTÍ
Teiknuð mynd af barni, kennara og foreldri sem sitja saman við borð.

Innritun og útskrift

Markmið reglna um innritun og útskrift nemenda af Táknmálssviði í Hlíðaskóla er meðal annars að tryggja jafnræði við umfjöllun umsókna og vandaða stjórnsýslu við afgreiðslu þeirra.

Reglur um innritun og úrskrift á Táknmálssvið Hlíðaskóla

Hvenær var Táknmálssvið Hlíðaskóla stofnað?

Árið 1999 hófst samvinna milli Hlíðaskóla og Vesturhlíðarskóla með námslega og félagslega blöndun nemenda beggja skólanna í huga. Á fundi fræðsluráðs Reykjavíkur 13. maí 2002 var samþykkt að Vesturhlíðarskóli og Hlíðaskóli yrðu sameinaðir í einn skóla undir heitinu Hlíðaskóli frá og með 1. september 2002 og frá þeim tíma innritast heyrnarlausir og heyrnarskertir nemendur á Táknmálssvið Hlíðaskóla.